周四(14日)凌晨法甲榜首大戰，「一哥」巴黎聖日耳門(PSG)作客以2比0擊敗第2位朗斯，拋離對方9分，提早1輪奪得冠軍，創出聯賽5連冠偉業，為出戰5月31日凌晨歐聯決賽對阿仙奴壯行色。

巴黎聖日耳門今場和波就可以捧盃，但球隊並冇留力，踢到29分鐘，奧士文尼迪比利喺前場截到波，立即打反擊，傳畀基華拉斯基利亞射入打開紀錄。朗斯落後之下傾力搶攻，但把握力欠佳，射門往往失之交臂。

反觀PSG反擊更加入肉，奧士文尼迪比利曾經起腳僅貼柱出界，門將沙科洛夫亦有出色發揮，包括救出朗斯前鋒韋斯利沙特勁射，封出達拉施馬近門起腳。

換邊之後，朗斯狂攻PSG，但運氣麻麻，包括達拉施馬射門中柱彈出，戰至補時，PSG憑1快速次反擊，由18歲新星伊巴謙麥巴耶射成2比0奠定勝局，連續5季成為法甲冠軍，累計14次捧盃屬於史上各隊之中最多。

PSG今季餘下1場聯賽作客巴黎FC已成為例行公事，可以專注備戰歐聯決賽。今季歐洲5大聯賽，西甲、意甲、德甲、法甲冠軍已經名花有主，剩下英超屬於阿仙奴同曼城之爭。

最強博彩盤路過關神器《串績王》：http://win.on.cc/football/